GATRA

Sawijining gatra kumambang ing tawang

Sunaring baskara datan bisa nyuremake

Kandeling mendung datan bisa nyamarake

Petenge wengi uga datan bisa nyirnake

Ananging malah nambah cethane

Jantraning panguripan kang nyakra manggilingan

Lir gumantining mangsa 

Bot repoting lalakon

Ruwet rentenging panguripan 

Anjalari gatra iku saya samar 

Lan saya sirna kintir ana ing ilining waktu

MANUK EMPRIT

Manuk emprit,

Kena apa sira tansah kekiter ngubengi awaku 

Tansah ngetutke langkah alonku

Nang kene aku wus meh mandeg amarga kentekan jangkah

Kamangka elarmu isih kuat ngaplak

sira isih bisa mabur duwur ngungkuli mega

Manuk emprit,

Lalekna bumi lan isen isene

Kae ana kluwung dalane para widadari

Mabura mrana tumuju kahyangan lan dadia manuk merak

Rupamu kang anyar bakal gawe sengseme para dewa